ӘЙЕЛДЕР КӘСІПКЕРЛІГІ ЖӨНІНДЕГІ САЛАРАЛЫҚ КЕҢЕС МҮШЕЛЕРІ БАЛАЛАРҒА МЕРЕКЕ СЫЙЛАДЫ
Балаларды қорғау халықаралық күніне орай Ұлытау облысы Кәсіпкерлер палатасы жанындағы Әйелдер кәсіпкерлігі жөніндегі саларалық кеңестің мүшелері Маруа Құлушева атындағы өмірлік қиын жағдайдағы балаларды қолдау орталығының тәрбиеленушілеріне мерекелік іс-шара ұйымдастырды.
Іс-шараның басты мақсаты балаларға қамқорлық, мейірім мен қуанышқа толы көңіл күй сыйлау болды. Орталық тәрбиеленушілері үшін қызықты байқаулар, ойындар, шығармашылық іс-шаралар мен тосын сыйларға толы мазмұнды бағдарлама әзірленді. Балалардың ерекше қызығушылығын байкерлердің келуі тудырды. Олар өздерінің мотоциклдерін таныстырып, балаларға жарқын әсер мен ұмытылмас сәттер сыйлады.Мереке шынайы жылы әрі әсерлі жағдайда өтті. Ұйымдастырушылар үшін балалардың шат күлкісі, қуанышты жүздері мен көтеріңкі көңіл күйлері ең үлкен марапат болды. Әрбір бала жағымды эмоцияларға бөленіп, үлкендердің қамқорлығы мен қолдауын сезінді.Қайырымдылық акциясының демеушілері мен ұйымдастырушылары ретінде Әйелдер кәсіпкерлігі жөніндегі саларалық кеңестің мүшелері мен өңір кәсіпкерлері қатысты. Олар жыл сайын әлеуметтік бастамалар мен қайырымдылық жобаларға белсенді түрде атсалысып келеді.Іс-шараны ұйымдастыру мен өткізу барысында еріктілер де қомақты үлес қосты. Олардың көмегімен мерекелік алаң безендіріліп, ойын бағдарламалары ұйымдастырылып, ерекше мейірім мен қамқорлыққа толы атмосфера қалыптастырылды.
Ұлытау облысы Кәсіпкерлер палатасы жанындағы Әйелдер кәсіпкерлігі жөніндегі саларалық кеңестің төрайымы Гүлнара Зағирова:
— Балалар – біздің болашағымыз. Әрбір бала қамқорлыққа, мейірімге және бақытты балалық шаққа лайық. Біз үшін тек қолдау көрсету ғана емес, балаларға жағымды әсер сыйлап, жақсылыққа деген сенімін арттыру және олардың жанында әрқашан қолдау көрсетуге дайын жандардың бар екенін сезіндіру маңызды. Балаларға нағыз мереке сыйлай алғанымызға шын жүректен қуаныштымыз, – деп атап өтті.Мұндай акциялар бизнестің әлеуметтік жауапкершілігінің маңызды бөлігі болып табылады және кәсіпкерлер қауымдастығының қамқор әрі игілікті қоғам қалыптастыруға үлес қосуға деген ұмтылысын көрсетеді. Ұйымдастырушылар іс-шараны өткізуге атсалысқан барлық серіктестерге, кәсіпкерлер мен еріктілерге алғыстарын білдіріп, өмірлік қиын жағдайға тап болған балаларды қолдаудың маңыздылығын ерекше атап өтті.
