​АҚ ЖОЛ, Shamshyraq.kz сайты!

Кеше, Сәтбаев қаласындағы «Достық» Үйінде қала әкімі жанындағы Ақсақалдар алқасының алқалы жиынында Shamshyraq.kz сайтының таныстырылымы болды.Өткен жылы Сәтбаев қаласының әкімі Асқар Абылайұлы Ыдырысовтың бастамасымен Жезқазған, Сәтбаев қалалары мен Ұлытау ауданының басшылығы, аталған аймақтың зиялы қауымы, мәдениет және өнер қайраткерлерінің кездесу болған еді. Кездесу барысында аймаққа ортақ сайт ашу жөнінде ұсыныс та айтылған еді. Shamshyraq.kz -тарихи — мәдени сайты сол ұсыныстың жемісі. Оны жасап шыққан жезқазғандық жас программист Әлібек Қаратаев. Сайттың «Жаңалықтар», «Аймақ мақтаныштары», "Өнер", "Әдебиет", Кітаптар", «Фотогалерея» және т.б. айдарлары бар. Есімі Жезқазған — Ұлытау өңіріне айрықша ыстық ұлы тұлға Қаныш Имантайұлы Сәтбаев арналған арнайы айдар аясында ғалымның өміржолына қатысты барлық дерлік деректерді топтастыру көзделуде.

Сайттың мән-маңызы, міндеті мен қызметі хақында «Шындық» қоғамдық бірлестігінің төрағасы Абдолла Дастанов және Жезқазған аймақтық «Сарыарқа» газетінің бас редакторы Дархан Мұхан  қысқаша түсінік берді.Сонымен, аймақтық сайт іске қосылды. Алдағы уақытта оның жұмысы жетілдіріле түсетіндігі айтпаса да түсінікті.