АХМЕТОВ Кенжебай

1963 жылы туған. филол. ғыл. кандидаты (2001), доцент (2004), ақын, жазушы, драматург, аудармашы. Ұлттық «Астана-Бәйтерек» конкурсының лауреаты (2003), ЖезУ алтын белгісінің иегері (2004). Әл-Фараби атындағы ҚазҰУ-дің филология факультетін бітірген (1985). Қарағанды обл. Жаңаарқа ауд. Ынталы орта мектебінде мұғалім, тәрбие жұмысын ұйымдастырушы (1985-1991), ЖезПИ-да қазақ тілі мен әдебиеті кафедрасының оқытушысы (1991-1996), ЖезУ қазақ әдебиеті кафедрасының оқытушысы, аға оқытушысы, доценті (1996-2003). «Айқын Нұрқатовтың әдеби сын, ғылыми-зерттеу еңбектері» тақырыбында канд. дисс. қорғаған (2001). «Алағай да бұлағай бір дүние» атты прозалық жинақтың (1993), «Әдебиеттану әліппесі» (2000), «Әдебиеттануға кіріспе» (2004) оқулықтарының, «Әдебиетті аңдату» (2003) электронды оқулығының, «Айқын Нұрқатов – әдебиет сыншысы» (2001), «Айқын Нұрқатов – әдебиет зерттеуші» (2003) оқу құралдарының, «Жүсіпбек Аймауытов драматургиясын оқыту» (1993), «Драматургиядағы тарихи шындықтың көркемдік сипаттарын оқыту» (1997), «Студенттердің жазбаша ғылыми жұмыстары» (2003) оқу-әдістемелік құралдары мен бірнеше ғылыми мақалалардың авторы. Әдеби даму проблемасына арналған теориялық ой-тұжырымдары ҚР ҰҒА академигі Рымғали Нұрғали құрастырған «Әдебиет теориясы» хрестоматиясына кірген (2003). «Ерте ояндым, ойландым, жете алмадым» драмасы ұлы Абайдың 150 жылдығына арналған Қазақстан театрларының фестивалінде Бас бәйгені жеңіп алған (1995). Пьесалары Атырау, Жезқазған театрларының репертуарына енген. Жезқазған обл. жазба ақындардың тұңғыш жыр сайысы – Мүшәйраның жеңімпазы (1993). Өлеңдері, повестері, әңгіме, хикаялары республикалық жинақтарда, орталық газет-журналдарда жарияланып жүр. 2019 жылы «Наза» фильмін түсірді.