АХМЕТОВ Қуаныш

1946 жылы  Ақтөбе облысы, Ырғыз ауданында туған-кен инженері, ақын, аудармашы, журналист. Алматы индустриалдық техникумын (1965) және Ленинград политехникалық институтын (1973) бітірген. 1977-1991 жылы Қ.Сәтбаев  атындағы  Жезқазған кен-металлургия комбинатында  инженер-механик, участок бастығы, №15 шахта бастығы, трестің  бас механигінің орынбасары, бас механигі болды. 1991 жылы республикалық газеттерде («Халық кеңесі», «Ана тілі», «Заң газеті», «Қазақ әдебиеті» және баспаларда («Әлем», «Фолиант») қызмет атқарған. 2003 ж. «Қазақ әдебиетінің» Астана қаласы және Орталық Қазақстан бойынша тілшісі болды.  А. «Біздің ат» атты тырнақалды өлеңі  1959ж. «Қазақстан пионері» газетінде жарияланған, «Қарлығаш»(1981), «Жетіген»(1984), «Қос арна»(1988), «Көзайым»(2004) жыр жинақтары, «Ұлы Даланың Ұлытауы» (Іт. – 1988, ІІт. – 2001), «Замана заңғарынан – С вершины времени» (2001), «Кенесары хан Ұлытау өңірінде» (2002) атты тарихи  тынымдық, зерттеу, публицистикалық кітаптары  Алматы, Омбы, Астана қалаларындағы  баспалардан шыққан, жекелеген шығармалары  30-дан астам ұжымдық  жинақтарға енген. Республикалық газет-журналдарда 40-тан астам  ғылыми зерттеу  еңбектері, 6 томдық «Ұлттық энциклопедияда» 17 мақаласы жарық көрген. Халықаралық республикалық ғылыми коференцияларда тарихи  тақырыпта баяндамалар жасалған. А. Вьетнам халқының көсемі  Хо Ши Миннің өлеңдерін, неміс  жазушысы  Вилли  Майнктің  «Марко  Полоның таңғажайып сапары» деректі кітабын («Аударма», 2004), орыс поэзиясының «алтын дәуірінің» белгілі өкілдері К.Ф.Рылеев, В.К.Кюхельбекер, А.И.Одоевский сияқты декабрист-ақындардың өлең-дастандарын, сібірлік атақты ақын П.П.Ершовтың «Сүзге сұлу» тарихи дастанын («Аударма», 2004.), ресейлік жазушы О.Г.Чистовскийдің Жезқ. өңірі жайлы баяндайтын «Жапан дала жан-жағың...» хикаятын қазақ тіліне аударған А. -  Қазақстан  Журналистер одағының С.Ерубаев  атындағы сыйлығының  лауреаты (1996), «Түркістанға - 1500жыл» айдарымен  ЮНЕСКО бағдарламасы бойынша өткен халықаралық әдеби конкурстың жүлдегері (2000), Кенесары хан атындағы  республикалық  сыйлықтың иегері (2002), Ұлытау ауданының Құрметті азаматы.