Ибрагим БЕКМАХАНҰЛЫ
Ибраһим БЕКМАХАНҰЛЫ - ақын, журналист. Ол 1951 жылы 22 маусымда Қызылорда облысы, Қармақшы ауданы, Ақтөбе ауылында дүниеге келген.
1969—1970 жылдары туған аулында киномеханик болған. 1974 жылы Қармақшы аудандық мәдениет бөлімінде шофер-механик болып жұмыс істеді. 1974 жылы Қармақшы аудандық «Коммунизм шамшырағы» газетінде корректор, радиохабарын ұйымдастырушы, аға тілші, 1979—1984 жылдары Қармақшы аудандық атқару комитетінде ұйымдастыру бөлімінің меңгерушісі, парткомның нұсқаушысы болып қызмет істеді. 1984—1997 жылдар аралығында Торғай облыстық «Торғай таңы» газетінде тілші, аға тілші, Жезқазған облыстық «Сарыарқа» газетінде тілші, мәдениет, ауылшаруашылығы бөлімдерінің меңгерушісі болды. 1997-2010 жылдары Қарағанды облыстық «Орталық Қазақстан», республикалық «Азия-Транзит» газеттерінің Жезқазған өңіріндегі меншікті тілшісі, Жезқазған қалалық «Наз» газетінің редакторы, аймақтық «Сарыарқа» газеті бас рдакторының орынбасары-жауапты хатшысы қызметін атқарған. Осы тұста газет жұмысынан қол үзбей, С.Қожамқұлов атындағы Жезқазған музыкалық драма театры әдебиет бөлімінің меңгерушісі болып 14 жыл қызмет жасады. 2010-2011 жылдары Қарағанды облыстық «Орталық Қазақстан» газетінің экономика және өнеркәсіп бөлімінің меңгерушісі, редакция алқасының мүшесі , 2011 жылдан «Қазақ газеттері» ЖШС-нің «Экономика» газетінің бөлім редактары, 2020 жылға дейін республикалық «Жеті жұрт» тілшісі болды.
Ибрагим Бекмаханұлы – атақты жырау, Сыр сүлейі Тұрымбет Салқынбаевтың туған немересі. Ол атасының әдеби мұраларын жинақтап, 1993 жылы оның 125 жылдық мерейтойына орай «Талайды таңырқатқан жырау едім» (Алматы, 1993, «Газет» баспасы), 2008 жылы 140 жылдығына «Атандым жас күнімнен бала жырау» (Қызылорда, 2008, «Полиграфия» Баспа үй), 2018 жылы 150 жылдығына «Жүйрігі едім халықтың» (Алматы, 2018, «Арна» баспасы) атты кітаптарын жарыққа шығарды.
И.Бекмаханұлы «Шапағат», «Сағымсары», «Сыр мен Арқа саздары», «Жарық сәуле», «Жүрегімнің шуағы», «Қасиетті мекен», «Жүректегі ырғақтар», «Сырдария-Ұлытау» атты поэзиялық, және «Сыр мен Қырдың перзенті», «Дария көңіл, тау мүсін», «Дария-ғұмыр», «Шалғайдағы емес, маңдайдағы театр», «Қарсақбайлық қайсар ұл», «Бекзат болмыс», «Кенжалы би» атты прозалық және көркем-публицистикалық «Жалмауызға да жан керек» атты сатиралық кітаптардың авторы.
Қазақстан Жазушылар және Журналистер одағының мүшесі Ибрагим Бекмаханұлы – республикалық ақындар Мүшәйрасының бірнеше дүркін жүлдегері. Журналистикадағы жемісті еңбегі үшін «Қазастан Республикасы Ақпарат саласының үздігі» атанды, Қазақстан Журналистер Одағының Құрмет грамотасымен марапаталды.
2021 жылғы 19 ақпанда өмірден озды. Мәңгілік мекені Алматыдағы "Кеңсай -2" қорымынан бұйырды.
САҒЫНЫШ САЗЫ
Сыр мен Қырдың телбаласы, ақын, журналист Ибраһим Бекмаханұлының есімі қазаққа жақсы таныс. Ол 2021 жылы ақпанда өмірден өтті. Жуырда Алматыдағы "Үш қиян" баспасынан "Сағыныш сазы" атты кітап жарық көрді. Бұл кітапқа Ибраһим Бекмаханұлы туралы естеліктер, оның шығармашылығы жөніндегі мақалалар, өмірден өткеннен кейін қаламгер құрметіне өткізілген мүшәйралардағы арнаулар мен өзінің бұрын жарияланбаған өлеңдері жинақталған.