ҚОЖАМСЕЙІТОВ Сағындық Үсенұлы

Қоғам қайраткері.

1941 жылғы 15 наурызда  Қарағанды обл. Ұлытау ауданы Кішітау ауылдық
кеңесінде туған. Қазақ мемлекеттік  университетін (1966), Алматы  Жоғарғы партия мектебін (1974) бітірген. Журналист. Еңбек жолын  Ұлытау аудандық «Сталин туы», кейін «Коммунизм туы» аталған газетінде бастаған.  Редакцияда әуелі 2 ай атшы болып істеген, кейін  газеттің жауапты хатшы  болған. Бұл кезде ол небәрі он алты жаста болатын. Бұдан соң аудандық комсомол комитетінің хатшысы  (1961), "Аманкелді"  кеңшарының  партком хатшысы (1962), Қарағанды облыстық «Орталық Қазақстан» газетінің меншікті тілшісі (1965) болды. 1967-1975 жылдары  Жезді аудандық, Сәтбаев қалалық партия комитетінің, 1975 жылдың қазанынан  Жезқазған обл. парт. комитетінің лекторлар тобының жетекшісі, насихат және үгіт бөлімі  меңгерушісінің орынбасары, 1980 жылдан осы бөлімнің меңгерушісі, 1989 жылдан -идеология бөлімінің меңгерушісі болды.

 1989 жылы Жезқазған облыстық атқару комитеті төрағасының орынбасары (1989) болып тағайындалып,  бұл қызметті кеңес өкіметі билігінің түрі ретінде таратылғанша істеді. 1992-1996 - жылдары Жезқазған облыстық кәсіптік-техникалық білім беру,  тілдер,  о құжаттама және  мұрағаттар басқармаларының бастығы болып істеді.  1996-2011 жылдары Жезқазған қаласы мемлекеттік мұрағатының директоры болды.

С. Қожамсейітов жоғары білім, халықтың көркемөнер шығармашылығы, тарих, мәдениет, табиғат ескерткіштерін қорғау, ел, өңір тарихын зерттеу бағыттарда, басқа да өзекті жобаларды іске асыруға бастамашыл болды, үлес қосты.

Ол 10 кітаптың, жүздеген очерктермен талдау мақалаларының авторы, бас редакторы.

Марапаттары:  КСРО кезінде «Құрмет белгісі» , Тәуелсіздік тұсында   «Құрмет» орденімен марапатталды.  Онға жуық медаль иесі.

Ұлытау ауданы мен Жезқазған қаласының Құрметті азаматы.

1959 жылы КСРО Журналистер Одағының мүшелігіне қабылданған. Сағындық Үсенұлына "Үздік өлкетанушы" құрметті атағы берілген. .

Кітаптары және жекелеген зерттеулері:

«Қанаттас қалалар» жинағындағы «Мыс магниткасы» зерттеу мақаласы 2 баспатабақ. «Қазақстан» баспасы 1966 ж.;

«Тастар сөйлейді» кітапшасы (Жезқазған кешенді геологиялық барлау экспедициясы жайлы очерк.«Қазақстан» баспасы, 1967ж.;

«Қарашаңырақ Қарсақбай» (зерттеу мақала, «Орталық Қазақстан газеті», 1968 ж.;

«Путеводитель государственного архива города Жезказган» (1905-2000), 30 баспатабақ, ЖезУдің баспасы, 2008ж.

Жезқазған. Фотоальбом. Құрастырушы әрі бас редакторы С. Қожамсейітов, «Өлке» баспасы, 2004ж.;

«Мұратымыз-халық игілігі, ниет-ар тазалығы» кітабы, К. Жолдыбай, С. Қожамсейітов. 15 баспатабақ. «Өлке» баспасы, 2010ж.;

«Жезқазған» энциклопедиялық анықтамалығы. Бас редактор С. Қожамсейітов,«Өлке» баспасы 2004ж.;

«Намыстан жаралған халықпыз» деректі анықтамалық кітабы 1986 жылғы желтоқсан көтерілісіне қатысушыларға арналған, 20 баспатабақ, «Арго» баспасы, 2011 ж.

«Қарашаңырақ Қарсақбай» кітабы. 14 баспатабақ. Астана, «Елорда», 2008ж.;

«Ел ұраны-Ұлытау» туристерге арналған кітап, 3 баспатабақ «Глассир» баспасы 2014ж.;

«Қазақ елінің кіндік мекені-Жезқазған» кітабы, 16 баспатабақ, Қарағандының «Классик» баспасы, 2014ж.;

«Ұлытау. Ұлытау ауданы» энциклопедиясы, 40 баспатабақ,«Кәусар» баспасы, 2018, бас редакторы С. Қожамсейітов