НАУРЫЗБАЙ Жұмағали Жөкейұлы
Ғалым, қоғам қайраткері.
1949 жылы Жезқазған кентінде туған. 1972 ж. Қарағанды мемл. универ., 1998 ж. Абай атындағы Алматы мемл. универ. тамамдаған. Еңбек жолын 1972 ж. мұғалім болудан бастады. Кейін техникум оқытушысы, универ. профессоры, кафедра меңгерушісі, ректоры, Ұлттық білім академиясы институтының директоры қызметтерін атқарған. 1977-1990 ж.ж. Жезқазған облыстық және Қазақстан Орталық партия комитеттерінің жауапты қызметкері болған. 1990 жылы ҚазКСР Президенті Кеңесінің кеңесшісі, 1991–1994 жылдары ҚР Президенті мен Министрлер Кабинеті Аппаратында сектор меңгерушісі, кеңесшілер тобының жетекшісі, 1994–1995 ж.ж. Жезқазған облысы әкімінің орынбасары, 1995-1999 ж.ж. ҚР Парламенті Мәжілісінің депутаты,2000-2009ж.ж. - Ө.А. Байқоңыров атындағы Жезқазған университетінің ректоры, 2009- 2011 ж.ж. Е.А. Бөкетов атындағы Қарағанды мемл. университетінің профессоры болды. 2011–2019 жылдары Ы.Алтынсарин атындағы Ұлттық білім академиясы кәсіптік және жоғары білім институтының директоры, тәрбие және этномәдениет орталығының, тәрбие теориясы және әдістемесі орталығының директоры қызметтерін атқарған. Қазіргі уақытта – осы орталықтың бас ғылыми қызметкері. Президент жанындағы Мемлекеттік саясат жөніндегі ұлттық кеңестің жауапты хатшысы, Кеден одағына мүше елдер Парламентаралық қауымдастығы бюросының,ТМД елдері Парламентаралық қауымдастығы тұрақты комитетінің мүшесі, Үкімет жанындағы мемлекеттік терминология және ономастика комиссияларының, Халықаралық «Қазақ тілі» қоғамы басқармасының мүшесі болған. III-IV шақырылған Жезқазған қалалық маслихатының депутаты. Педагогикалық ғылымдарының докторы, профессор, академик. Қазақстан Республикасы Президентінің 1996 жылғы 15 шілдедегі №3058 Өкімімен мақұлданған «Қазақстан Республикасындағы этникалық-мәдени білім» тұжырымдамасының, «Ұлттық мектептің ұлы мұраты», «Этнокультурное образование», т.б. монографиялардың авторы. Ғылыми мектебі қалыптасқан, 3 ғылым докторы мен 10 ғылым кандидатын дайындаған. Е.А. Бөкетов атындағы Қарағанды мемлекеттік университеті біріккен диссертациялық кеңесінің, «Ақиқат», «Мысль», «Қазақстан жоғары мектебi», «Қазақстан мектебi», «Тәрбие құралы», «Ұлағат» және т.б. журналдардың редакциялық алқаларының мүшесі болған. Қазір Л.Н. Гумилев атындағы Еуразия Ұлттық университеті мен С. Сейфуллин атындағы Қазақ агротехникалық университеті жандарынан құрылған PhD диссертациялық кеңестерінің, «Білім-Образование» және «Кәсіпкер-Профессионал» журналдарының редакциялық алқаларының мүшесі. Қазақстан Журналистер одағы сыйлығының иегері. Тіл саясаты, білім беру, мәдениет және ұлтаралық қарым-қатынас мәселелеріне арналған көптеген мақалалардың авторы. «Ұлттың ұлы бола алсақ», «Өмір қақпасы», «Тұлғалар туралы толғаныс», «Открытая политика» және т.б. кітаптары жарық көрген. Қазақстан Жазушылар одағының мүшесі. Өлеңдері «Қазақ поэзиясының антологиясына» енген. «Махаббат киесі», «Лағындай ерке киіктің», «Ғашықтық – бақыт», «Күз-көңіл», т.б. жинақтары бар. Өлеңдеріне жазылған «Жан жайлауым – Жезқазған» әндер ықшам-дискісі шыққан. Білім беру ісінің құрметті қызметкері, Жезқазған қаласының Құрметті азаматы. «Құрмет» орденімен, Қазақстан Республикасының 8 медалімен, «Барыс», Ы.Алтынсарин және А.Байтұрсынов атындағы төсбелгілермен, «Өнеркәсіпке қолдау көрсету» Француз қауымдастығының алтын медалімен (SPI) марапатталған. Қазақстан Республикасының Білім және ғылым минс.-нің «200 озат оқытушылар мен ғалымдар» тізіміне, «Қазақстан Республикасы жоғары мектебінің көрнекті ғалым-педагогтары» энциклопедиясына енген.
2020 жылы қайтыс болды.
