ЖОЛДЫБАЙ Кенжеболат

Саясаттанушы, публицист, Қазақстан Журналистер одағының мүшесі.

1951 жылғы 18 желтоқсанда Қарағанды облысының Жезді кентінде дүниеге келген.

Жезқазған облыстық партия комитетінде экономикалық білім беру жөніндегі кеңесші, лектор, саяси ұйымдастырушы, қоғамдық пікірді зерттеуші тәрізді жұмыстармен, Ұлытау ауданы әкімінің орынбасары ретінде идеология және әлеуметтікмәселелермен айналысты. Алғашқыда Жезқазған облыстық «Білім» қоғамы, кейіннен 1993 жылдан Жезқазған облысы жабылған мамыр айының 1997 жылына дейін Халықаралық «Қазақ тілі» қоғамының Жезқазған облыстық ұйымы төрағаларының орынбасары болды.

ҚР Мәдениет және ақпарат министрлігінің БАҚ басқармасы бастығы, «Казахстанскаяправда» республикалық газетінің бас редакторының орынбасары, «Заң» АК» ашықакционерлік қоғамының Астана қаласындағы өкілдігінің жетекшісі, «Қазақстан» РТРК» акционерлік қоғамы төрағасының бірінші орынбасары, «ҚазАқпарат» ұлттық компаниясы» АҚ вице-президенті, «Sunna.kz» ақпараттық агенттігі бас директоры, «Еуразия + ОРТ» ЖШС бас директорының кеңесшісі болды.

Республикалық «Бас редакторлар клубы» қоғамдық бірлестіктің президенті ретінде Кенжеболат Жолдыбай Қазақстан тарихында тұңғыш рет «Қазақстан Республикасы журналисінің этика Кодексінің» қабылдануына өзінің қомақты үлесін қосты. Клуб құрамына жаңа тың ойлы редакторлар қабылдап, бірлестік жұмысын жүйелендірді. Кенжеболаттың тікелей басшылығы кезеңінен бастап Клубтың беделі артып, масс-медиа қауымдастығы мойындайтын қоғамдағы маңызды азаматтық институтқа айналды.

Әр жылдары Кенжеболат Жолдыбай бірқатар маңыздысаяси-әлеуметтік жобаларды іске асырды:

1) Жас Астананың имиджін қалыптастыру, сондай-ақ жастарды қолдау мақсатында «Астана – жастар көзімен» байқауы ұйымдастырылып, кейіннен ол «Еуразия сақинасы» халықаралық жастар ақпараттық форумына айналды. І форум ШҚО-ның Риддер қаласында Президент Н. Назарбаевтың қатысуымен өтсе, V форум Мәскеу қаласында өткізілді.

2) Ұлы Абайдың 150 жылдығына орай 178 км. қашықтықты құрайтын «Семей - Жидебай» жаяу жорық акциясының ұйымдастырушыларының және қатысушыларының бірі болды.

3) «Казахстанскаяправда» республикалық газетінің акциясы шеңберінде Алатаудың Өгем сілеміндегі 4034 метр биіктіктегі шыңды бағындырып, оны «Казахстанскаяправда» шыңы» ретінде ресми география картасына тіркетті.

4) Отандық БАҚ-ты қолдау үшін «Қазақстандық БАҚ - EXPO» көрмесін тұңғыш рет ұйымдастырып, оны жыл сайындәстүрлі түрде өткізіп отыруды жолға қойды.

5) Мемлекеттік тілдің мәртебесін көтеру мақсатында «Ұлттық ұран Ұлытаудан тасталды» атты республикалық телемарафон ұйымдастырушылар қатарында болды.

Күнделікті жұмыстармен қатар шығармашылықпен де айналысты. «Бұл жылдардың мен де бір куәсі» (2001 ж), «Мұратымыз: жер, ниет, ар тазалығы» (2002 ж), «Времяжить и творить» (2006 ж), «Қазақстан 2030: Болашақтың бағдаршамы» (2006 ж),«ПритяжениеРодины» (2010 ж), «Өткен күнде белгі бар» (2011 ж) атты кітаптардың авторы. Бұл кітаптар ҚР Ұлттық академиялық кітапхананың электрондық нұсқасында сақталған.

«Құрмет» орденінің кавалері. 2010 жылы бұқаралық ақпарат құралдарын дамытуға қосқан үлесі үшін Қазақстан Республикасы Президентінің Алғысы жарияланған.

«Қазақстанның тәуелсіздігіне 10 жыл», «Қазақстан Конституциясына 10 жыл», «Астана - 10 жыл», «Қазақстан халқы Ассамблеясына 20 жыл» мерекелік мемлекеттік наградалармен, ҚР Ақпарат және коммуникация министрлігінің «Ақпарат саласының үздігі» төсбелгісімен, Білім және ғылым министрлігінің «Ыбырай Алтынсарин» төсбелгісімен, Қазақстан Республикасы Парламенті Сенатының, ҚР Төтенше жағдайлар бойынша министрлігінің, Қазақстан халқы Ассамблеясының Алғыс хаттарымен, Ішкі істер, Еңбек және әлеумет, Мәдениет және ақпарат министрліктерінің Құрмет грамоталарымен марапатталған.