ЕШТАНАЕВ Ғазиз Елеусізбайұлы
1958 жылы 22 наурызда Қарағанды облысы Шет ауданы Кеншоқы ауылында жұмыскер отбасында туған.
Орта мектепті бітірген соң Шет ауданы орталығындағы кәсіптік‑техникалық училищені (СПТУ‑174) машинист‑тракторшы мамандығы бойынша бітірді. 1982 жылы Е.А.Бөкетов атындағы Қарағанды мемлекеттік университетін филолог‑оқытушы мамандығы бойынша тамамдады.
Шет ауданы Ақсу‑Аюлы селосындағы кәсіптік‑техникалық училищеде тракторшы (1976‑1977), Шет орта мектебінде қазақ тілі мен әдебиеті пәнінің мұғалімі (1982), мектеп директорының орынбасары (1987), Үңірек ауылдық Кеңесі төрағасының мәдени жұмыстар жөніндегі орынбасары‑Мәдениет үйінің директоры (1988‑1989), облыстық «Сарыарқа» газетінде (бұрынғы «Жезқазған туы» газеті) тілші (1989‑1992), Жезқазған педагогтік институтында оқытушы (1992‑1996), Ө.А.Байқоңыров атындағы Жезқазған университетінде кафедра меңгерушісі (1996 жылдан), «Ұлытау» ғылыми орталығының директоры (2001), Ө.А.Байқоңыров атындағы Жезқазған университетінің тәрбие жұмыстары және жастар саясаты жөніндегі проректоры (2005), «Ұлытау» ғылыми орталығының директоры (2007). 2011 жылдан осы уақытқа шейін Жезқазған қаласының мәдениет және тілдерді дамыту бөлімінің «Тілтану» оқу-әдістемелік орталығының директоры және негізгі жұмысқа қосымша «Ұлытау және Ұлт» республикалық тарихи-танымдық, көркем-әдеби журналында жауапты редактор болып істейді.
1999 жылдың 22 желтоқсанында Л.Н. Гумилев атындағы Еуразия Ұлттық университетіндегі Диссертациялық кеңесте (К14.31.03) «Доскей Әлімбайұлының әдеби мұрасы және Орталық Қазақстандағы ақындық дәстүр» деген тақырыпта кандидаттық диссертация қорғады. 1 оқу құралы, 2 оқу‑әдістемелік құралы, 50-ден астам ғылыми мақаласы жарық көрген.
Өлендері қалалық, облыстық, республикалық басылымдарда жарияланған, бірнеше жинақтарға енген. Алғашкы жыр жинағы 1996 жылы «Жыршуақ» (Жезқазған), 1999 жылы «Дүние‑дүрмек» (Алматы), 2006 жылы «Шұғыла‑шуақ» (Алматы), «Тамшыда да тағдыр бар» (Алматы), «Нүкте» (Алматы) деген атпен жарық көрді. Республикалық, облыстық, аймақтық жыр мүшәйраларының жүлдегері. Қарағанды облысы әкімінің сыйлығының «Тіл майталманы» номинациясының (2012), Жезқазған қаласы әкімінің «Жыл ақыны» (2000), «Жылдық үздік қаламгері» (2012) сыйлықтарының иегері.
Қазақстан Жазушылар одағының, Қазақстан Журналистер одағының мүшесі.
«Қазақстанның тәуелсіздігіне 20 жыл» мерекелік медалімен, «Қазақстан Республикасы білім беру ісінің Құрметті қызметкері» белгісімен және Қазақстан ЖОО қауымдастығының А.Байтұрсынов атындағы қола медалімен («Саңлақ автор»), «ЖезУ-дің Алтын белгісімен», Қазақстандық салалық мәдениет, спорт, туризм және ақпарат қыметкерлері кәсіподағының «Еңбек даңқы» төсбелгісімен және Жезқазған қаласы әкімінің, қалалық Мәслихаттың Құрмет грамоталарымен, алғысхаттарымен, «Жезқазғанға 65 жыл» мерекелік медалімен марапатталған.
