​"ҚАРАКӨЗ" ансамблі

Өткен ғасырдың 70-жылдары қазақ эстрадасының өрлеу жылдары болды. Алматылық студенттерден құралған «Дос-Мұқасан»  дүниені дүрілдете жөнелсе, сайын Сарыарқаның Жезқазған тәрізді жұмақ мекеніндегі өнерпаз жастар да өнерден өз орындарын табуға ұмтылды. Сәлімжан Сейілов, Жақсыкелді Сейілов, Болат Есмұқанов, Қойшықара Әміралин, Әбу Түсіпбеков және т.б. өнерлі жастар өзара келісіп вокальды-аспаптар ансамбль құруға бел буды. «Іздегенге сұраған», «сабақты ине - сәтімен» демекші, 1970 жылы сол кездегі «ұлы көсем» В.И.Лениннің туғанына 100 жыл толуы күллі Кеңес Одағындағы басты мерекеге айналып жатқан еді.  Өнерге деген ынтық құлшыныспен  құрылып,үлкен сахналарға шыға алмаса да той-домалақтардың көркіне айналып жүрген оларға бір күні аяқ астынан облыстық байқауға қатысу туралы ұсыныс жасалды. Шындығында, тапсырма берілді десе жарасқандай. Өйткені, байқауға таза қазақ тілінде ән айтатын бір  ансамбль  қатысуы талабы қойылса керек. Ал, байқау ережесіне сәйкес әрбір ансамбльдің атауы болу керек. Сөйтіп, қысылтаяң шақта  ансамбльге «Қаракөз» деген атау беріледі.