БАЙҚОҢЫРОВ Өмірхан Аймағамбетұлы

1912 жылы 14 қыркүйекте Қарағанды облысы Ұлытау ауданында туған. 1940 жылы қазіргі Қазақ Ұлттық Университетін бітірген.  1941-1952 жылдары Жезқазған кен өндірісінде әртүрлі жауапты қызметтер атқарды. 1952-1962 жылдары Қазақ кен-металлургия институтының (1952–1962) ректоры; 1962-1964 жылдары - Қазақстан Ғылым академиясының академик-хатшысы және Кен ісі институтында зертхана меңгерушісі,  1965–1980 жылдары Қазақ политехникалық институтында кафедра меңгерушісі болды.Техника ғылымдарының докторы (1972), профессор (1959), Қазақстан Ғылым академиясының академигі (1962), Қазақ КСР-інің еңбек сіңірген жоғары мектеп қызметкері (1971) атанды. Ленин орденімен және т.б. медальдармен марапатталған. 1980 жылы 15 наурызда қайтыс болды. Академик Ө.А. Байқоңыровтың есімін мәңгі есте сақтау үшін Жезқазған университетіне (ЖезУ), Қ.И. Сәтбаев атындағы Қазақ ұлттық техникалық университетінің Тау-кен институтына (ҚазҰТУ), Алматы, Жезқазған және Сәтбаев қалаларындағы көшелерге ғалымның есімі берілген, кеніш басқармасының ғимараттарында (Жезқазған руднигі), Алматы қаласындағы тұрғын үйлерінде, Жезқазған руднигінде, «Кен орындарын әзірлеу технологиясы» кафедрасында ескерткіш-тақталар орнатылған, ҚазҰТУ мен ЖезУ-дегі дәрісханалар академик Ө.Байқоңыровтың есімімен аталады, Жезқазған университетіндегі оқу ғимаратының алдына монумент пен тас мүсіні қойылған. Өмірхан Аймағамбетұлы -  Жезқазған -Ұлытау аймағынан шыққан алғашқы академик.