БАЙБОСЫНОВ Ахат Әукенұлы

1957 ж ылы 9 ж елтоқсанда Қарағанды облысы, Жаңаарқа ауданы Атасу кентінде дүниеге келді. Орта білім алған соң Жезқазған қаласына келіп, Тайжан Қалмағанбетов атындағы облыстық филармониясына күйші, музыкант болып жұмысқа орналасты. 1975–2005 жылдар аралығында осы филармонияда еңбек етті. 2005 жылы Алматы қаласына қоныс аударады. 2005- 2009 жылдар аралығында Құрманғазы атындағы мемлекеттік консерваториясында «Тәттімбет» атындағы сыныбында ұстаздық қызметін атқарды. 2006–2009 жылдар аралығында Алматы қалалық гуманитарлық коммерциялық колледжінде сырттай оқып, бастауыш мектеп мұғалімі мамандығын алады. 2009–2010 жылдар аралығында Алматы қалалық гуманитарлық техникалық университетінде көркемдік жетекші қызметін атқарды. 2011–2013 жылдар аралығында Астана қаласындағы Қазақ Ұлттық өнер университетінде Халықаралық қарым-қатынас және шығармашылық жұмыстар қызметі жетекшісінің орынбасары қызметін атқарды. Тәттімбеттің 195 жылдығына орай Алматыда өткен республикалық күйшілер сайысының Гран-при иегері. «Аққу үні», «Өркиік», «Тұңғиық», «Ұлытау», «Төрт тұлға», «Қадыр қосбасар», «Шіркін-ай», «Нарсұлу», «Шашу», «Түгіскен», «Гүлзада» т.б. күйлердің авторы. Күйші Тоқа Шоңмаңұлының (Сайдалы Сары Тоқа) 30 шақты күйін зерттеп жарыққа шығарып, «Алқалы қосбасар» атты (оқулық, хрестоматия) кітабын жазды. Қазір күй мектеп студиясын ашып, шығармашылығын жалғастыруда.