Анарқұлов Ысқақ

Жезқазған шахталарында кен өндіре жүріп алғаш рекордтық көрсеткішке қол жеткізген, стахановшы атанған бұрғышы. Оншақты жыл ішінде қарапайым жұмысшыдан шахта бастығына дейін көтерілген. Оның әкесі отызыншы жылдардың басында өзімен ержеткен балаларына жұмыс іздеп Жезқазғанға көшіп  келген. Бұрыннан байларға жалданып еңбектің ауыр дәмін татқан Ысқақ шахтада бұрғышы мамандығын тез игеріп әкетеді.

      Ұлы Отан соғысы басталғанда Ысқақ Анарқұлов №31-32 шахтаның бастығы болып тағайындалды. Тап осы шахтада Оралдан келген бұрғышы Илларион Янкин бүкілодақтық рекорд жасаған еді. Ол бірден бес бұрғылау қондырғысымен жұмыс істеп, жоғары көрсеткішке қол жеткізген. Оның бастамасын шахтаның көптеген бұрғышылары іліп әкетіп, бірнеше рет жаңартты. Бірнеше бұрғымен (перфоратормен) кен өндірген Ахметқали Сафаев, Балмахан Аймаханов, Павел Шаталюк, Зейнолла Биболатов стахановшылар қатарына қосылды. Сөйтіп, Ысқақ  Анарқұлов өзінің үлкен ұйымдастырушылық қабілетін танытты. Ешқандай оқу орынын бітірмеген Ысқақ Анарқұлұлына өзінің  зеректігі , еңбектегі тәжірибесін өз бетімен көтерген білімімен ұштастыра білетіндігі көмектесті. Ол 1941 жылы Жезқазған кен басқармасықасындағы аттестациялау  комиссиясының шешімімен бірінші дәрежелі тау-кен істерінің мастері атағын алды. 1945 жылы «Қызыл ту» орденімен марапатталды.

Жезқазған қаласындағы көшеге Ы.Анарқұловтың есімі берілді.